होता आलं पाहिजे झाड

माणसाला होता आलं पाहिजे झाड,
त्याला उगवता आलं पाहिजे,
प्रस्तराच्या नाभीतून…
आणि सताड झेपावत आकाशात,
पसरवता आल्या पाहिजे फांद्या…
त्याला डोलता आलं पाहिजे,
वाहणार्‍या वार्‍यासोबत,
त्याला बोलता आलं पाहिजे,
बरसणार्‍या धारांसोबत…
तो हसत राहावा,
हिवातील दवबिंदूंच्या कणांतून
नि रापत्या उन्हातून…
त्याला सहता यावीत सारेच ऋतुरंग,
गाळून शिशिरात पाने,
वसंतात पुन्हा बहरावे…
…खोडाने उभे असावे कणखर,
मुळांनी शोधत ओल,
रुतावे मातीत खोल खोल…

-राम बागडे
गोंदिया.
7798159213